「撥動琴弦唱出低迴婉轉嘅旋律
引得心如鐵石嘅普路托淚濕雙頰，
令地獄允許將愛情所求嘅配畀佢。」
——《沉思頌》尊．彌爾頓
賓客都認為呢個係個完美嘅婚禮
新郎奧費斯
係最偉大嘅詩人同音樂家
新娘尤麗狄絲
係一個寧芙仙女
人人都知佢哋好相愛
突然間，尤麗狄絲躀低落地
等奧費斯趕到時，佢已經過身
咬死佢嘅蛇喺草叢度滑走
尤麗狄絲嘅喪禮之後
奧費斯悲痛欲絕
決定去冇人可以翻生嘅地府度
救返佢嘅摯愛
喺地府門口，奧費斯彈起佢嘅豎琴
樂聲美妙到令門口嘅三頭犬
西柏萊斯瞓低
畀奧費斯行過
喺冥河幫鬼魂擺渡嘅卡隆
亦俾奧費斯嘅音樂感動到
免費幫佢過河
奧費斯入到冥宮
對著冥王同冥後唱歌
傾訴佢對尤麗狄絲嘅愛念
佢話，尤麗狄絲走得太早
既然終有一日佢會好似萬物一樣
永遠留喺冥界
噉冥王可唔可以畀佢返生幾年？
奧費斯唱完之後，成個地獄一片肅靜
西西佛斯冇繼續推石頭上山
坦達羅斯冇再想飲禁忌之水
甚至連復仇之神法利斯，都竟然開始喊
冥王同冥後同意奧費斯嘅要求
不過有個條件
喺佢離開冥界時
佢唔可以擰轉個頭來睇尤麗狄絲
唔係嘅話，尤麗狄絲將會永遠留喺冥界
奧費斯開始爬
每爬一步
佢都擔心一下
尤麗狄絲有冇真係跟喺後邊
佢咩都聽唔到
尤麗狄絲嘅腳步聲喺邊？
最尾，喺奧費斯即刻要離開冥界時
離光明就差一步時
佢卒之忍唔住擰頭
奧費斯再次返到地府時，食咗閉門羹
失去尤麗狄絲之後
奧費斯發誓唔會再愛上任何女人
佢喺樹林度歌唱悲傷嘅愛情故事
有關於宙斯任命為伺酒神嘅
美少年加尼米德
有關於因為愛上父親而俾懲罰嘅麥拉
有關於將象牙雕成理想女人嘅皮格梅隆
佢向維納斯祈禱
直到雕像成為真人
仲有同維納斯有關嘅︰
佢寵愛嘅、俊美嘅阿多尼斯俾野豬殺死
奧費斯嘅愛同喪失之痛
令佢見到凡人同神明嘅心
但係，詩歌滿足唔到所有人
有群叫邁納德斯嘅癲女人
冇辦法接受
呢個歌頌美好愛情嘅詩人對佢哋嘅無情
佢哋嘅嫉妒使佢哋癲到殺咗奧費斯
雀仔，大自然嘅歌唱者
為佢默哀
用水聲唱歌嘅河流都係咁
呢個世界冇咗兩個偉大嘅靈魂
尤麗狄絲同奥費斯深深相愛
佢哋分離後
奥費斯明白咗愛嘅悲與喜
於是，情詩呢種新嘅藝術形式就誕生咗
世界喺度喊時，奥費斯感覺到平靜
佢同愛人喺冥界團聚
直到依家
佢都仲同尤麗狄絲喺冥河邊散步
有時並排行
有時尤麗狄絲行先
有時奥費斯行先
佢鍾意時不時擰轉頭去望尤麗狄絲